Salud ang saro sa pinakaimportanteng aspeto nin buhay nin tawo, kung maluya o kung igwa ning deperensya ang satong salud, siertong may problema kita.

Namamate ngonian sa bilog na kinaban ang pagkahandal sa epekto kan Corona Virus na lakop na sa ibang parte kan kinaban. Harus gabos, kabado sa posibleng transmission kan virus na hale pa sa nasyon kan China.

Ang hapot, sundo nuarin kita maiwas tanganing makadulag sa huma kan virus?

Duwang measure ang naheheling tang remedyo. Enot, iyo ang pagsaguibo kan inaapod na preventive measures sa paagui kan pagbasa, pagdangog asin pagsunod sa mga abiso kan mga eksperto. Proper hygiene asin tamang approaches ang kaipu asin sistema tanganing maiwasan na maulakitan kan virus.

Ikaduwang measure, iyo ang pagdasal sa Mahal na Dios na dai kita maulakitan asin hagadon ta na makadiskubre ang mga experto nin bulong tanganing dagus makasurvive ang mga nauulakitan. Ngonian, ang pinaka-importanteng mga panahon tanganing mas pang pakusugon ta ang tiwala sa Mahal na Dios. Sabi ngani, dai ning problemang dai nin solution. Parte ini kan pagtesting ning Mahal na Dios tanganing pukawan kita sa satong mga gawe.

Kung kita yaon pa permi sa linyada nin kadikluman, ini ang tamang panahon tanganing itanos ang mga dating gawe asin mamuhay susog sa kabotan niya. Testing man ini sa lado kan mga mga namamayo kung papano ang saindang epektibong measures na mas pang maging epektibo pa sa saindang mga sinumpaan na trabaho.

Ang mga virus, sa history, come and go man sana asin ingkaso inabot na ang sukdulan luway luway na ining napapara. Kung kaya, dai kita maghadit dahil sierto y sigurong magkakaigwa ini ning real solution ini. Saro ining pagsubok kan Mahal na Dios asin siertong igwa ning magkakanigong solusyon.

************

Nin huli sa volume nin mga pasahero na minaagui sa mga pantalan kan San Andres asin Virac, medyo masasakitan ang satong mga otoridad tanganing iproseso gabos na maipasairarom ang mga ini sa epektibong thermal scanning o anuman na measures tanganing dai makalaog sato ang virus.

Kung sa airport, todo ang higot, sa mga pantalan, gare masyadong relax. Dakulang bagay na dai pa ning kaso sa Catanduanes nin huli ta kung igwa nin magiging pasyente, posibleng maging kawsa ini panic asin pagkahandal.

Kaipu digdi ang mahigot na lakdang kan mga otoridad tangaing maibitaran ang anuman na magiging inkombiniensya ngapit na aldaw.

*********

Dinangog kan Sangguniang Bayan nin Virac sa botong 7-2 ang naging apelasyon ni Mayor Posoy Sarmiento na paramientras na suspendiron ang Ordinansa sa Taripa mantang nasa proseso pa nin pagdangog asin deliberasyon ang magiging kasalida kan suspendidong ordinansa.

Boot sabihon, free willing ngonian, ang pamresyuhan kan mga vendors ning sira basado sa pag-urulay na dai man mapatong ning masyado halangkaw na presyo.

**********

Matrayumpo ang naging pagdangog kan SB Virac sa bagong proponidong Ordinansa sa presyo ning sira, karne asin iba pang mga marine products. Pukumas uminos, aabuton pa nin duwa sundong tolong bulan, antes na maipautob ang bagong ordinansa.

Basado sa proseso, maagui pa ini nin 2nd asin 3rd hearing, then dadarhon sa opisina kan alkalde for approval asin 30 days sa Sangguniang Panlalawigan for review, then, almost tolong semana sa publication antes dagus ng ipatupad ang bagong ceiling price.

Ang saro sa pinaka-obheto kan Ordinansa na iregulate ang price ceiling o so pinakahalangkaw na presyo. Kung siisay man magsobra o magbayular sa sinabi ng mga itinalaan na presyo, siertong igwa nin penalidad. Meaning, ang pigapenalize sana iyo ang magsobra, pero bako ang magbaba sa presyo nin huli ta paborable sa consumers kung maghababa ang presyo lalo na kung igwa ning pinag-aapod na law supply and demand.

Sa ibong na lado, ingkaso, mag-abot ang punto kan kakulangan nin supply, dai pwedeng maging rason kan mga paratinda na kulang ang supply kung kaya dai pwedeng sunudon ang ordinansa. Ini ang nangyayari ngonian, nin huli ta so pinag-aprobaran na Ordinansa kan nakalipas na SB composition asin dating administrasyon, masyado soboot hababa.

Sarong dakulang leksyon ini sa lado kan bagong komposisyon kan SB asin kan bagong alkalde ngonian. Dapat dai pagmadalion ang aprubasyon, kundi maging lenient sa pagbusisi manongod sa ilalaag na presyo tanganing dai maging sayang ang pagpanday asin pagpagal. Remember, may kwartang nakataya digdi sa pagkunducir ning public hearing sundo sa pagpublikar. Dapat  mag-agi sa hararom na pag-aadal asin maging patas sa lambang lado tanganing malibyano ang implementasyon.

***********

Advertisement