LEGAZPI CITY – Nag-abot sa labi P208 million an kantidad kan iligal na droga na nakumpiskar kan Philippine Drug Enforcement Agency (PDEA) Bicol sa rehiyon, dawa sa tahaw kan pandemic.

            Sa intrevista ki PDEA Bicol information officer Cotton Talento, dai nagpundo an ahensya sa ibong kan mahigot na restrictions.

            Nakapaglunsar nin 2, 175 anti-drug operations kun sain 1, 202 an naarestar. Nakapagsagibo man nin buy-bust operation, search warrant implementation, interdiction asin case build-ups an ahensya kan nakalihis na taon.

            Ipigkokonsiderar na pinakadakulang kantidad kan iligal na droga na nakua, an nangyari kan Enero 16, 2020 sa pantalan kan Matnog, Sorsogon na nag-abot sa 19 kilos nin shabu asin duwa man an naarestar.

            Nadestroso naman ini kan Nobyembre makalihis na babaan nin direktiba kan korte.

            Mientras tanto, sarong incumbent municipal councilor sa Caramoran, Catanduanes man an pinakadakulang personalidad sa high value target list an naarestar na pigsentensyahan na nin life imprisonment.

            Para sa taong 2021, pig-aasikaso kan regional office an pagkumpleto sa unified drug watchlist kan PDEA, PNP asin iba pang law enforcers susog sa direktiba ni PDEA DGen. Wilkins Villanueva.  (Ruffa Lozada)

Advertisement