Pinagsuspendir kan Comelec ang last salvo kan Presidential asin Vice presidential debate kan Abril petsa 23 asin 24 nin huli sa pagkakautang soboot sa Sofitel hotel ning maabot sa 14 milyones de pesos makalihis na dai mabayadan kan saindang partner na Impact Hub Manila.

Nin huli kaini, dakul ning  disganado sa naging sistema kan Comelec kung nata nagkua pa ning ibang kontraktor asin guminastos pa nin dakulang kantidad mantang pwede man sanang makipag-partner sa lado kan mga darakulang TV station na dai ning gastos.

Basado sa ley, igwa ning libreng oras na dapat itau ang arin man na media entity sa lado kan Comelec tanganing gamiton sa information dissemination asin iba pang lakdang tanganing maging matrayumpo asin trangkilo ang pirilian.

Dakul ning nakubanan sa sinabi ng impormasyon kung nata ta milyones ang naging kontrata sa sarong kompanya mantang pwede man sanang pasimplehon ang Sistema ning debate.

Saro pang obserbasyon, haros dai ngani ning nangyaring debate sa format kan duwang magkasunod na debate nin huli ta gare man sana interview ang sistema.

Ang magayon na format ning diskusyon iyo na nakasentro sa mga kandidato ang format asin  bako so mga hosts. Mas magayon seguro kung pinadiskarte ini sa lado kan mga media outlets tanganning sinda ang mag craft ning komperehensibong sistema kung papano mailuwas kan mga kandidato ang saindang kapas sa debate asin bako ang mga motherhood statements.

Naluwas kaya na pinagdisenyo kuta sa sarong paboritong asin special na kandidato ang format, alagad dai man ngani nag-atendir…hehe

Saro pang palso kan Comelec nin huli ta dai ninda napanindugan ang saindang pagiging otoridad kan election makalihis na isnabon sinda ning duwang kan duwang frontrunner (kuno) na kandidato.

Dakulang insulto sa institution ang ginibo kan duwang duwag na kandidato na dai nag-aparesir sa debate asin dai sinda pinagtawan ning respeto. Ang palusot kan Comelec, dai soboot ning batas tanganing mag compel sa presensya kan mga ini. Nem, iba ang tinitingnan sa kinikilingan. Pigarespeto niyo so mga aplikante pero kamo dai pigarespeto. Kawawang Empty handed Comelec.

Sa mga botante, magboto kita ning law abiding citizen, kung saen, kita ang importante sainda, bako na sinda ang mas impormante satuya. Ang election, saro paagui tanganing husgaran ta ang mga dapat serbidor asin bako mga nangangamuhan sa sato.

Dai kita masilaw sa kwarta, maging sa mga mahahamot na tataramon, aramon ang track record asin bakong basado sa kantidad.

**************

Naging mainit na tema sa isinaguibong Diskutiran sa CATSO kan petsa 19 ang issue sa EBMC.

Segun sa sarong panelist, nata daw ta gabakal man guiraray sa luwas ang mga pasyente kan mga bulong na pinagreseta maging laboratory imbes na i-provide kan pharmacy sa ospital.

Segun sa simbag ni incumbent governor Joseph “Boboy” Cua, dai na-renew so kontrata sa sarong pribadong pharmacy na iyo ang pinagdelegar na maprovide ning bulong sa paagui kan consignment basis para magsuplay nin bulong.

Magayon ang konsepto kan consignment basis sa sarong pribadong pharmacy nin huli ta dai man gabos available sa laog kan hospital pharmacy ang mga reseta nin huli ta kadaklan na beses iba ang reseta kan mga doctor sa available na bulong sa hospital.

Alagad, reparo ta, nata dai ma-provide kan hospital pharmacy ang kompletong bulong na kaipu kan mga pasyente? Nata kaipu ta pa ning tagaluwas na pharmacy mantang igwa kita ning in house pharmacy? Maging sa issue kan laboratory.

Remedyo, kung talagang gustong kumita kan EBMC komo pinagdeklara na ining economic enterprise, kaipuhan na igwa ning bulong ang pharmacy maging laboratory nin huli ta iyo ini ang pinagkikitaan ning hospital. Kung dai ning arog kaining mga resources, self-destruction ang dalagan kan manihamiento. Siertong bakong pag-income asin survival ang pigaisip kan mga administrador kan hospital, kundi pagkalugi. Meaning, ang pigakitaan lang kan hospital iyo ang room and board. Naluwas na board and lodging sana man sinda.

Dapat metingon kan administrador kan hospital ang mga personnel, particular ang mga doctor sa saindang obligasyon sa saindang pinagtatrabahuhan. Do not kill the hen that lays the golden egg.

Kung ano ang regular na kaipu na mga bulong, iyo ang ilatag asin irekomendar kan mga doctor para sa mga purchases tanganing kadabes na mareseta ang mga doctor, igwang available sa saindang pharmacy. Labi kaimportante ang mga laboratories asin uya gaganar ang sarong hospital, kung kaya, dapat i-provide ini kan management, by all means.

Nata gasakripisyo ang kapitolyo asin ang provincial government sa pag-shoulder kan mgaa gastos sa hospital mantang dakul ning pwedeng pagkakitaan?

Ang kaipu kan provincial government na administrator may aram sa negosyo asin bako sa dole out. Nata ta gakita ang mga pribadong ospital na mas dakul ang pasyente sa EBMC?

Komo provincial hospital, dakul ning rekursus naturales ang EBMC. Premero, sagot ning PhilHealth ang parte kan bill, ang sobra kung ini cover nin “No Balance Billing” igwa ning ayuda  (financial AID) dyan ang Congressional kada taon, igwa ang PCSO, igwa ang PSWD asin iba pang mga ahensya na iyo ang shock-absorber.

Meaning, dai pwedeng malulugi ang EBMC asin makita pa ning marhay nin huli ta igwa sinda ning captured client. Ang hapot, napapasaen ang income kan EBMC. Ang simbag, sa mga pharmacy  asin laboratories sa luwas. Ang tada sa EBMC, tinga.

Kung ang plano, sa laog ning sampulong taon, self-sustaining na ang EBMC basado sa provision kan Economic Enterprise, sobra sa kaya kuta na ining abuton, kung tamang mga persona ang ga-manage sa financial aspect kan EBMC asin kung kooperado ang mga doctor asin mga personahes.

Ang kaipu sa EBMC, mag hire ning competent person na may aram sa pagpadalagan nin hospital business, bako so mga nagtuturog sa pansitan asin naghahalat ning pagtumba ning aldaw. (FB EYE/FERDIE M. BRIZO)

Advertisement