Practice makes perfect

FB-EYE
Typography

Nagtumar aksyon na ang Penafrancia Shipping Line sa kahurutan kan Sangguniang Panlalawigan maging kan mga biyahero manongod sa pagbawas nin pamasahe. Dakula ang maitatabang kaini sa mga biyahero na makatipid man nin sintimos dara kan padagus na pagbulasok kan presyo kan mga produktong petrolyo sa merkado.



Alagad, ang pinaghahalat kan publiko iyo ang biyaheng San Andres na pagsasadiri kan Regina Shipping Line na mas dakul ning mga nagsasarakaw kumpara sa biyaheng Virac nin huli kan bakong halawig na oras sa pagbyahe.

Aram tang may proseso ang pag-applay kaini sa lado kan Marina, alagad, judgment call na man ini sa lado kan manihamiento kan Regina Shipping Line na magtumar aksyon man sa pangapudan kan publiko bilang parte kan saindang social responsibility.

Halaton ta ang magiging kasimbagan digdi ni President/ CEO asin Mayor Peter Cua kan San Andres. Dapat na sundan man ini kan Virac tricycle. Sundo sa ngonian, mantinido ang dating pamasahe sa ibong kan mga pangapudan asin agrangay kan publiko. Give and take dapat paminsan-misan.

***********

Sa personal tang opinion, dai na kaipuhan pang ipaagui sa lehislasyon ang pagtau nin gratipikasyon sa mga atleta, partikular ang mga ganador. Premero, goal permi kan lambang player ang manggana sa mga ralaban orog na sa Palarong Bicol. Ikaduwa, trabaho ini kan mga namamayo sa lado kan DepEd kung papano magiging produktibo ang saindang mga atleta tanganing preparado sa laban.

Ang mas kaipu digdi ang komprehensibong programa. Dai kaya outright na manggagana ang mga players o may resulta deretsu kung ngonian pa sana pinupunan ang mga reporma. Segun sa mga opisyal kan DepEd PONDO ang kaipuhan ninda para sa training tanganing bastanteng panahon na mahinog ang kalidad asin kapasidad kan mga parakawat.

Dawa na milyones kaya ang itau kan local na govierno na gratipikasyon, kung dai nin magkakanigong preparasyon, useless ang ralaban. Siyempre, kapurit permi. Tungkusan ta sinda Mayweather buda si Pacman kung papano nagpipreparar sa laban. PRACTICE MAKES PERFECT ika nga.