Influential Person

FB-EYE
Typography

Fantastic/Walastic: Saro na sa maikukonsiderar na “influential person” sa kinaban ning boksing ngonian si Manny Pacquiao. Sarong walastic asin fantastic na karisma ang dara ni Pacman kumpara ki Mayweather kung kaya, mas halangkaw ang saiyang endorsement ads sa ngonian. Dai mabilang sa kamot ang nag-aapreciar sa saiyang kakayahan asin pagiging sportsmanship sa laog asin luwas kan lona. All eyes nakatutok sa saiya, kung kaya, ini ang saro sa pinakamasakit mantiniron, ang expectation nin fans.

Hale sa pagiging pobre asin ngonian tinatamasa ang rurok kan saiyang trayumpo, dakulang pigura ini pabor sa satong henerasyon. Sabi ngani kan sakong magurangon na si dating Vice Mayor Aureo Brizo, ang sekreto nin trayumpo kaipuhan nakabase sa 90% perspiration and 10% inspiration. Dai magdakula ang payo kung nasa summit kana nin tagumpay. Ang mga nasa taas, tendency paibaba.


Vox populi vox dei : Nasa mainland ang saindong lingkod kan magbisita si Bise Presidente Jejomar Binay sa Probinsya nin Catanduanes kung kaya dai ta masaksihan ang paglapigot kan Bise na pag-apelar sa mga Catandunganon para sa saiyang pangaturugan na maging pinakahalangkaw na surugoon kan Nasyon.

Nagkapirang issue ang naipaabot saindong lingkod regarding sa official visit kan Bise. Segun sa impormasyon, gare naging kampanya na ang tonada mantang gamit ang pondo kan govierno sa pag-akomodar asin pag-estimar kan mga binisitang lugar.

Personalmente, Pinagrurukyaw ta ang pagbisita kan Bise dahil siya pa sanang Bise Presidente ang nakapagkonducir kan arog kaining paglibot sa halos 99% na munisipyo nin Catanduanes. Kung ngonian ang eleksyon, panalo na si VP Binay. Kaya lang sa 2016 pa, kaya dakul pang kakaunon na bagas antes marealisar ang pangaturugan na maging Presidente.

Ang paglibot kan Bise, pambawi ini sa padagus na pagbagsak kan saiyang popularidad komo presidentiable dahil sa mga akusasyon na ipinaggagapo sa saiya kan mga kakontra-partido. Alagad, may kasabihan na “kung igwa nin usok, igwa nin kalayo”. Kaya ang burden of proof digdi nasa parti kan mga nag-aakusar, alagad dapat maipaliwanag kan Bise nin labi kalinaw ang mga akusasyon.
Igwa nin dikit na hinanakit sa organizers o coordinator sa probinsya ang nagkakapirang media personalities nin huli ta gare initsapwera na makahapot o maging parte kan pagbisita.

Saro sa mga negatibong naobserbaran iyo na gare campaign period na ang dating. Komo, official visit, dapat naimbitaran man soboot ang mga incumbent provincial officials na makisabay sa saiya.
*******