Point of Care

FB-EYE
Typography

Inaprubaran na kan Philhealth Region V ang aplikasyon kan EBMC para sa inaapod na Point of Care (POC) system.

Ang Point of Care, sarong programa kan PhilHealth na may obhetong marealisar ang inaapod na universal coverage. Partikular na iki-cater kaini iyo ang mga poorest of the poor na nalagpasan o dai pa na-aydentipikar kan DSWD asin DOH sa National Housing Targeting System (NHTS). Basado sa reglamento, sasakupon sana kaini iyo ang Class c-3 asin D o ang inaapod na mga pobreng maray na individual na naconfine sa hospital.

Ang point of care mandatory sa mga DOH retained hospital mantang optional sa lado kan LGU.

Ang mga dai mapasar sa sinabi ng pamantayan, pwede magsadiri paghulog nin PhilHealth premium o pwedeng isairarom sa enrollment kan LGU tanganing maka-avail kan Philhealth benefits.

Ang bentahe kan Point of Care, ang premium otomatikong babayadan kan hospital derekta sa Philhealth mientras na naka-confine. Arog kan mga regular member, sakop man ini kan eksistidong case rates system asin ang inaapod na No Balance Billing (NBB). Sa madaling sabi, dai ni singkong kusing dapat na babayadan ang pasyente sa facility dawa magsobra o dai sa case rate sundo sa marahay sa kahelangan.

Basado sa surat ni Regional Vice President (RVP) Boy Inigo, Jr. kaipuhan munang akomplisaron kan EBMC ang mga kinakaipuhan na basic requirements, arog kan stable internet connection, trained IT personnels asin social workers na iyo ang 24/7 magiging parte kan programa.

Magayon na programa ini sa rason na dai na madedeprive ang mga pobreng tikoy na biglaang nako-confine sa EBMC na daing kwarta. Sa automatic enrollment perming 1 year ang babayadan kan hospital sa kantidad na 2,400 dawa na Disyembre na.

Kung aanalisaron asin kung tatawanan nin magkakanigong pag-aadal kan hospital dai sinda malulugi sa sistemang ini kung mama-manage sana kan mga personahes kan EBMC ang epektibong pagbulong sa mga pasyente nin huli sa case rate system.


Actually, dai kaipuhan na magpoint of care kan EBMC tanganing magkaigwa nin ganansya sa mga pasyente nin huli sa case rate. Igwa kita nin mga esksistidong miyembro kan Philhealth sa mga kategoriya kan self-employed, employed, ofw, lifetime member asin senior citizen. Ang mga sponsored member ang nakakabentahe sa prebelihiyo kapareho kan masasakop kan Point of Care enrollees nin huli ta sakop sinda kan No Balance Billing.

Sa point of care, posible ngani na malugi ang hospital nin huli ta sasaguton ninda ang premium asin gabos na gastuson kan pasyente dawa magsobra sa case rates.
Ang dapat pag-adalan kan manihamiento kan hospital kung papano ninda ma-imanage ang mga kahelangan na dai magsobra sa case rates tanganing kitang-kita ang KITA.