Sinabi ni DepEd Regional Director Gilbert Sadsad kan nagtalikod na semana na igwa nin maabot sa 76,000 sa sarong Press Conference na mga kaakian ang inaapod na “non-readers o struggling readers sa Bicol Region.
Nagkaigwa ning dikit na kontrobersiya digdi makalihis na mailuwas sa Philippine Daily Inquirer na naging laman man ning social media kan nagtalikod na petsa 17 kan bulan ning Pebrero.
Segun sa nakaulay tang saro sa mga opisyal kan DepEd, parte soboot ini kan saindang survey tanganing makakua nin tamang numero asin idea kung haen na ang DepEd asin kung ano ang mga dapat pang maimprove.
Segun sa Philippine Informal Reading Inventory (Phil-IRI), aki pa ang isinairarom sa survey asin ang iba digdi mga grades 1-3 pa sana.
Bako ng bago ang lakdang na ini sa obhetong maaraman kung saen pwede magtutok ang DepEd asin anong atake ang guiguibuhon.
Man laen laen na reaksyon kabale na ang issue manongod sa pagkuwestyon sa competence kan mga maestro y maestras asin ang kahurutan na haloy ng dagdag sa sweldo.
Sa satong opinion, normal ang arog kaining survey asin magkakanigo ang lakdang na ini tanganing madeterminaran kung saen mapoon asin arin pa ang kulang sa aspeto ning pagtuturo. Parte ini kan measures tanganing aramon kung siisay ang may kakulangan, ang mga paratukdo, magurang o mga estudyante maging ang mga pasilidad asin mga materials na ginagamit.
Actually, dai matatawadan ang espwersus kan mga paratukdo tanganing tiyagaan ang mga kaakian tanganing magdakula na may mahiwas na kaaraman pasiring sa puturo. Inisyatibo ini, bako sana sa lado kan mga paratukdo, kundi obligasyon kan gobyerno tanganing maging matabangan ang publiko sa lado kan literacy.
Sa ibong na lado, ang problema sa pagbasa maging pagsurat asin iba pang aspeto obligasyon kan gabos na lado. Alagad komo ang DepEd asin ang mga paratukdo ang mayor na natukahan sa pag-edukar kan mga estudyante, dai man pwede maging padatulan ang pagiging pagal, dakul na trabaho asin volume kan mga estudyante nin huli career ini na saindang mga sinumpaan.
Ang pagtukdo sarong inaapod na noble profession asin sarong career. Boot sabihon, saro ining passion asin bako sana pagdelihensya. Sinda ang mga inaapod na foundation of the next generation asin digdi nakataya ang dakulang obligasyon.
Dakul ang nakulgan na mga paratukdo sa pagkwestyon kan nagkakapirang magurang manongod sa paghagad ning dagdag na sweldo samantalang may naheling na resultang arog kaini ang DepEd. Ang totoo, makulog talagang isipon ang arog kaining issue, alagad, dai ta man pwedeng deharan ang katotohanan na igwa ning mga nagkakapirang paratukdo na sweldo sana ang target, alagad so dedikasyon sa trabaho dai man nasasaboot.
Igwa ning mga paratukdo na napiritan sanang magturo nin huli ta iyo ang dakul ning bakanteng pwesto, alagad dai ning passion kung kaya, digdi posibleng magfailure ang Sistema ning pagtuturo. Igwa ning mga paratukdo na gare pigasuldot ang lubot na mag-uli na ning amay nin huli sa saindang destino na harayo sa saindang estada.
Deserving ning halangkaw na sweldo ang mga paratukdo, alagad, dakul din ang kulang ning gobyerno tanganing simbagan ang kakulangan sa mga eskwelahan.
Tama ang obserbasyon ni Congressman Josey Salceda, kung dakul ning dai nakabasa sa lado kan mga estudyante, bako lang sa bicol, posibleng may problema ang ibang aspeto kan programa kan govierno. Partikular na issue digdi ang 4Ps program na alokado ang dakulang kantidad.
Saro sa obheto kan 4Ps iyo na mai-compel ang mga magurang na makalaog sa eskwelahan ang mga kaakian karibay ang subsidy kan govierno. Ang hapot, nasusunod ba ini? Kung dai, dapat rebyuhon ang programa.
Ipinagpaluwas ang preliminary data kan Phil-IRI matapos magluwas sa 2018 Programme for International Student Assessment na kulelat sa “reading comprehension,” o pag-intindi sa binabasa, ang Pilipinas kumparar sa 79 bansa.
Nin huli sa servey kumbinsido ang mga opisyal kan DepEd na igwa ning problema ang education system sa nasyon asin kaipuhan ang magkakanigong reporma.
Aminado man si Deped Secretary Briones na “kalidad” ning edukasyon ang problema asin mawot na tutukan ngonian nin huli ta resulbado na ang access kan mga estudyante sa mga eskwelahan makalihis ang pagpatugdok ning mga school buildings sa bilog na nasyon katakod kan k to 12 program.
************
Congratulations sa LGU Catanduanes sa pangengenot ni Acting Governor Shirley Abundo asin ang sampulong (10) mga munisipyo na nakaganar kan Seal of Good Local Governance (Good Financial Housekeeping) para sa 2019 SGLG evaluations.
Dakulang motibasyon ini tanganing mas lalo pang pakusugon kan mga LGUs ang saindang standards sa pagmanehar kan mga rekursus naturales kan govierno, partikular ang financial management asin pagiging transparent.
Medyo, dai lang nakompleto ang onseng munisipyo, alagad sarong lesson man ini sa lado kan LGU Baras tanganing maghinguha si Mayor Paulo Teves asin saiyang team Baras na masimbagan ang kulang asin by next year maging 100 percent ang probinsya sa sinabi ng prestihiyusong award.
Dakulang hamon ang masunod na taon sa lado kan LGU Virac. Ingkaso Makua ninda ang sunod pang award, magiging grand slam na ang LGU sa sinabi ng lakdang.
Segun ki Provincial Director Uldarico Razal, magiging ley na ini asin mandatory na ang pagsunod kan mga LGU sa lakdang na ini. Historically, seal of good housekeeping ini kan panahon ni dating DILG secretary Jesse Robredo asin ngonian ipinagpapadagos kan presenting administrasyon.
