Basado sa intrevista niato ki Supt. Socorro Dela rosa kan DepEd Catanduanes, pinakapremero sa lado kan DepEd na magkaigwa sinda ning exit conference bilang assessments kan performance sa nakaaguing Palarong Bicol 2018.
Sa sinabi ng komperensya nagluwas ang man laen laen na deperensya kung nata nagpalyar kitang makaangat sa dating record kan nagtalikod na taon. Segun sa opisyal, kulang sa training, endurance asin permi kitang kapos sa finishing touches. Nagluwas man ang poor officiating kung saen nagkapirang kawat ang soboot dinaya kita. Ini soboot ipapaabot sa opisina rehunal kan palaro tanganing dai na maulit asin dai na maplantar ning protesta.
Kabale man sa nagluwas sa urulay iyo ang idea kung papano maremedyuhan ang haloy ng problema kung nata permi kitang murhi. Kabale sa mga naheling ang pag-adaptar sa estratehiya kan ibang probinsya kung papano nasusustenir ang perming nasa top spots.
Igwa ning bibilugon soboot na 5 year development plan ang DepEd para sa sinabi ng programa, kung saen ngonian na school year 2018-2019 sa ralaogan ning klase sa Hunyo mapoon na sinda sa pag-escout ning mga potential players na isasairarom sa training.
Kabale man sa pinag-aadalan iyo ang adap-athlete program kung saen may mga trainors na kokontakon na iyo ang matrain sa aki mientras na dai pa panahon nin ralaban. Makoordinar man soboot sinda sa local na govierno kan Catanduanes, sa paagui kan Sangguniang Panlalawigan tanganing makahagad ning intervention sa magiging kontribusyon sa sinabi ng kaplanuhan.
Well, pinag-rerekunucir ta ang sinabi ng espwersus kan DepEd asin dapat matutukan nin marhay tanganing dai man kita maging consistent na kagpurit sa kada taon. Kung nasa 13 kita ngonian na taon, kaipuhan na mahale ta ang 3 asin Makua ang 1. Wishful thinking ang bagay na ini, alagad daing imposible kung tututukan. Harus, gabos man na delegasyon nag-agui sa arog kaan na proseso.
Kan panahon na perming nasa topspot ang Catanduanes pinag-adalan man kita kan ibang probinsya kung kaya naadaptar man ninda ang satong sekreto. How to defeat our enemy is of course, know first the weakness and strength of our enemy. Alagad, dai ta pwede iitsapwera ang kapasidad niato dawa sarong isla nin huli ta dakul kitang potential players na pinagpipirata nin ibang probinsya. Ang mga ini ang dapat alagaan tanganing maging pambato sa mga masunod na laban.
Sarong magayon na estratehiya, tutukan ning marhay ang individual events, arog kan boksing, athletics lalo na ang swimming, kung saen dakul ning pwede makukua sa Catanduanes. Ang swimming alone, sobra 60 ang posibleng makuang medalya kaysa sa mga ballgames na dakul players alagad saro man sana ang bilang sa medalya.
May suhestyon ako para sa masunod na Palaro, Dai na pag gamiton ang BAGWISH este, BAGWIS Catanduanes, kundi , “BAG GOLD Laban Para sa Catandungan!” Sana dai maging “BAG GOLBOLAN”. Hehe.
**************
PAGING! The Philippine Coastguard diyan sa San Andres. Pinagrereklamo kan mga parasisira ang kawaran ing ilaw kan PAROLA. Ang parola ang saro sa dakulang giya kan mga paradagat lalo na ang mga parasira na naglalawod kung banggi.
Kan nagtalikod na bulan, dai soboot nakadoong ning banggi ang Calixta dahil zero visibility asin dai ning ilaw na naheheling sa parola.
*************
Nagdadakul ang nairerehistrong mga karumal-duman na krimen sa Catanduanes. Naoobserbaran ta ang pagiging visible kan mga pulis niato sa mga barangay, alagad gare poblacion sana ang natutukan mantang mga liblib na lugar gare na-ooverlook.
Kabale sa mga nairehistro ang pang-rape asin panggagadan sa sarong daraga, pananaksak kan sarong pamangkin sa saiyang tiyoon. Anyway,dai man gabos kayang tutukan kan PNP ang mga lugar, alagad mas pahiwason pa ang koordinasyon asin training sa mga barangay officials asin tanod sa pagresponde asin pagmantinir ning pase orden sa mga lugar, lalo na duman sa mga isolated areas.
**********
