Udok sa boot an sakuyang intensyon na ipasabot tabi saindo na pigarespeto kan saindong lingkod an tinaram ni Department of Interior and Local Government (DILG) Secretary Eduardo M. AΓ±o na nagluwas sa Manila Bulletin Online buda sa Inquirer.net kun saen saiyang sinabi na an sakong suspensiyon hanggan soboot sa Abril 2020.

Kung magiging pinal na kapagbootan niya, babakantehon ko tabi an opisina ning Gobernador sa maabot na aldaw. Dai tabi ako maduwa-duwang tubudon ini, siring kan pagtubod ko sa pagsuspendi sako kan Abril 30, 2019.

Alagad, dakulang kahaputan ko man sana na kun ngata pig-iinsistir na an sakuyang kasal’an iyo an pagbalga soboot sa Republic Act 3019 o Anti-Graft and Corrupt Practices Act mantang an isi kong naging sala ko iyo an kasong Gross Neglect of Duty, rason na ngata ako nasuspendi nin sarong taon na matapos ngani kutan-a ngonian na Abril 30, 2020. Nagirumduman ko pa ngani na bago ako magsumpa bilang gobernador, pigsierto sako nin sarong opisyal nin DILG digdi sa probinsiya na maasumir daa ako sa posisyon kan Hulyo 1, 2019 na dai man ngani nangyari kan uminabot na an memorandum.

Tama tabi si Secretary AΓ±o na ako suspendihon hanggan Abril 30, 2020 kun an kasal’an ko pagbalga sa R.A 3019. Alagad, ta dai pa man napapatunayan na igwa akong sala kontra sa leyeng ini, dai pa man dapat mag-apply sako an suspensiyon na ini. Segun sa Section 261 (x) kan Omnibus Election Code (OEC), pinagbabawal an magsuspendi nin lokal na elihidong opisyal, magin preventive man o penalidad, sa laog nin eleksiyon period na segun sa Comelec Resolution No. 10429 nagpoon Enero 13, 2019 hasta Hunyo 12,2019.

Kaya sa giya kan sakong abogado, nag-asumir ako kan sakong pwesto bilang gobernador nin huli ta segun sa saiya naserbihan ko na an sakong suspensiyon kan natapos an sakong enot na termino bilang gobernador kaining Hunyo 30, 2019 alas dose nin aga.

An basehan soboot iyo an Section 66(b) kan Local Government Code of 1991 o Republic Act 7160 kun saen pinagbawal na maglampas an penalidad nin suspension sa natatadang termino. An sitwasyon na ini, pareho man sana sa reassignment nin mga empleyado sa gobyerno na sarong taon man sana tabi an termino na maski i-recall o dai nin Head of Agency kusang mabalik sa saiyang dating pwesto.

Habo ko man tabing makasuhan na nagpabaya ako sa pwesto na kun saen pigtiwalaan asin binotohan ako kan mga Catandunganon. Siring man, habo ko man makasuhan sa pag-kugos nin sarong posisyon na dai pigrekognisar nin awtoridad. Arin man sa duwa, ako asin an mga tawong nag-elehir sa sakuya an pirming lugi.

Gusto ko man tawan nin duon na nagpaisi man tabi ako sa DILG Regional asin Provincial Office sa paagi nin surat kan sakong abogado na ako ma-asumir na ngani kan sakong pwesto bilang gobernador. Naghalat po ako nin simbag sa DILG na honrahon an sakong assumption asin dai man ako nin ibang opisyal na aksyon na ginibo nganing ulangon an transaksyon nin kapitolyo kundi an ipaisi na ako nag-asumir na kan sakong opisina. Kabali sa pag-asumir na ini an magian na pakikiolay sa satuyang maboot na Acting Governor Shirley Abundo.

Ako tabi nagtutubod sa leye asin yaon pirmi an pagrespeto sa mga nanunungdan. Dai man sa intensyon ko an banggaon an sarong leye na dai man nin rason asin basehan. Siring man, dai man sa motibasyon ko an ribungon an mga Catandunganon na maresulta man sana nin satong pagkabaranga. An nangyaring ini sinserong pagpahiling nin sarong lider na kayang ipaglaban an mga tawong nagtutubod sa saiya.

An motibasyon ko, kaiba an pangadyi sa Kagurangnan, iyo an mga tawong naghahalat sa sakuya na magbalik na.

(Para sa mas detalyadong kaaraman, nakakabit digdi an surat nin sakuyang abogado na tinao sa DILG).