Padagus na minadakula ang sakop kan kontrobersiya nin corruptions sa Bureau of Corrections. Ini katakod kan nagpapadagus na imbestigasyon kan senado manongod sa issue kan Good Conduct Time Allowance (GCTA).
Sa pinakahuring hearing kan Huwebes, pinagdenitir muna ang tolong mga opisyal kan Bucor nin huli sa selyado soboot ang mga kimot kaini katakod kan mga nalalantad na anomaliya lalo na ang issue sa corruption. Kasabay sa nabuyagyag iyo ang “GCTA for sale” asin ang “hospital for sale” kairiba na ang special treatment sa nagkapirang maswerteng presunero.
Sa ibong na lado, haloy na palan ang sistemang ini alagad ang hapot nata ta dai pa man guiraray napupurok dawa na may mga binugtak ng mga bago ang Presidente?
Sa panahon ni Senator Leila Delima, ang dating DOJ pinagrumpag na digdi ang nadiskubreng mga kubol asin iba pang mga paraphernalias. Kaya sa saiyang pagmitir sa sinani ng issue, duman siya nagkaigwa ning kontrobersiya na iyo ang pinagsasapar niya ngonian sa presuhan sa alegasyon na nagkaigwa siya ning fund raising sa mga presunero katakod kan saiyang kandidatura kan nagtalikod na 2016.
Padagus pang pinagdadangog kung gurano katotoo ang alegasyon sa Bicolana Senator.
Mientras tanto, dapat na rebyuhon kan kongreso ang laog kan GCTA law na igwa ang pinakamainit na issue ngonian. Saro sa dapat amiendaran iyo ang sobra kahalangkaw na libertad na pinagtatau sa mga convicted criminals na harus may epekto man mga naging biktima. Ang suma total, natawan ning jusice so mga convicted alagad nagkrear man nin injustice sa pamilya asin sa lado kan mga naging biktima.
Sa Catanduanes, lima man soboot ang mga nakalaya na katakod kan GCTA law. Naghahagad ang mga ini nin pabor ki Presidente tanganing kunsideraron ang saindang libertad na pinagbayadan na man sa dakul na panahon. Alagad, kung susunudon ang ley, dai dapat kairiba sa mga dapat tawanan iyo ang mga convicted na “recidivists, habitual delinquents, escapees asin mga personang convicted lalo na sa heinous crimes.
Ang hapot, deliberate, Good faith o may negligence ba ang naging kasalan kan mga opisyal kan Bucor sa implementasyon kan ley? Kung sabihon nindang customary practice na ang sinabi ng implementasyon, saro ining wrong mistake asin dapat saindang pagbayadan. Dapat dai man malibre ang mga personang harani ki Presidente tanganing papanaguton sa naging negligence kan mga ini, mantang sinda ang pinagtawanan ning mandato tanganing magmanihar.
***************
Nangapudan ang BJMP sa banwaan ning Virac katakod kan kakulangan ning mga paraphernalias na pwedeng magamit kan mga presunero sa laog kan saindang karsel. Por medyo ini sa congestion sa numero nin mga presunero nin huli sa oplan tokhang asin iba pang krimen.
Ang hapot, ano ang reporma na pinagsasaguibo nin govierno tanganing supuneran ang pangangaipong ini kan mga jail sa probinsya? Saro ini ssa dapat asumiron kan Duterte administration, particular na saro ini sa saiyang mga prime campaign sa saiyang administration. Kung sobra na sa kapasidad ang sinabi ng mga kulungan, makakalaom kitang dakul pang mga Bucor similar anomalies ang mangyayari nin huli sa demand ning sitwasyon.
Ang aram ta pinagpapaimplementar na man sa lado kan BJMP ang GCTA. Mas magayon na tutukan ang computation sa GCTA partikular kung kapable ang mga ini tanganing ma-decongest ang mga kulungan. Decongestion ang saro sa mga mayor na obheto kan GCTA law.
*************
Liwat na pinagtawanan doon ni Department of Tourism Regional Director Benjie Santiago ang paglaag ning mga full pledge Tourism Officers sa mga munisipyo.
Sa saiyang pagtaram bilang saro sa mga resource speakers sa Tourism Awareness na pinagpadrinuhan kan Provincial Tourism Office kan nakaaguing semana, sinabi kaini na next year, isasabay na sa mga requirements kan SGLG ang tourism bilang saro sa mga aspeto ning development sa nasyon.
Wake up call ini sa lado kan mga local Chief Executives asin Sangguniang Bayan na tawan ning atensyon ang pormal na pagprayoridad sa turismo, particular ang paglaag ning mga tourism officers na magiging pangenot na point person sa pag-isip sa mga aspeto pangturismo. Nin huli sa padagus na pagbabago nin panahon, kasabay ang turismo sa may mayor na aspeto sa progreso. Harus kadaklan na mga gadgets ngonian minatutok sa pagpagayon sa personalidad asin kapalibutan, kung kaya, kaipuhan matutukan kan mga local officials ang turism driven programs and projects sa saindang area of responsibility.
**********
Kudos ki Acting Governor Shirley Abundo sa development na isinasaguibo sa laog kan kapitolyo. Partikular digdi sa lado kan children’s park. Igwa ng pinaglaag na mga cartoon characters sa right wing kan kapitolyo tanganing maging parke kan mga kaakian. Farmville ang saro pa sa target kan gobernador sa likod na parte tanganing mapakinabangan ang mga idle areas na haloy ng pinagpapasabsaban ning mga karbaw asin kanding.
Saro pang pwedeng guibuhon digdi ang inaapod na “Catanduanes Wildlife Park”. Pwede ining partneran kan pribado asin pampublikong mga individuals tanganing maheling man kan mga Catandunganon ang man laen laen na klase nin hayop o mga endanfgered species na permi sanang estorya sa mga eskwelahan.
Mahiwas ang lugar kan kapitolyo asin ang mga proyektong ini ang mga laudable projects na magiging tourism attraction kan kapitolyo. Pag-improve sa pintura nin kapitolyo ang pwede pang maging concern kan lokal na govierno.
