Dakulang hamon sa parte ni Bicol’s pride Vice Presidente Leni Rodredo ang maging parte guiraray bilang gabinete ni Presidente Rodrigo Duterte komo Drug Czar.
Dakul ng naging drug Czar sa nagtalikod na mga administration, alagad dai akoong nadangog na natapos ang issue sa droga. Maging si president Duterte pinagburbaran ang giyera, alagad mas lalong minadakul ang mga nadadakop.
Ang breakthrough sa panahon ni Presidente iyo ang Tokhang na dakul ang nagsuko asin dakul man ang nadakop, alagad dakul man ang nagadan. Inia ng inaapod na collateral damage. Ang pigaklamar ni VP Leni, dakul ang saradit na mga individual asin inosenteng civilian ang nadamay, alagad ang mga darakulang sira dai napadusahan.
Sa saiyang pagpreside sa pinaka-enot na meeting kan Inter-Agency Committee Against Drug (ICAD) saiyang pinaglinaw ang saiyang position asin mga gusting mangyari.
Pinag-omaw kaini ang mga ahensya arog kan PDEA, DILG asin iba pang ahensya na dakula ang naging papel tanganing sundan ang kausuguan kan president kontra droga. Ang saiyang position, so mga magagayon asin epektibong operasyon ipagpapadagus asin ang mga semplang sa pagheling pupunduhan.
Kabale sa binanggit niya na punduhon ang Tokhang operation na nagkawsa soboot ning negatibong impression sa publiko. Imbes, aramon ang mga mas pang hararom na approach tanganing tuldukan ang arog kaning mga operasyon.
Gusto niya soboot tuldukan ang garadanan, alagad, dapat papanaguton ang mga dapat managot.
Although, prior sa saiyang meeting, enot ng nagpatutsada ang mga alipores nin Presidente sa senado na “may war pa ngaya na daing nagagadan? Segun ki senator Bato Dela rosa, mantang segun man ki Senator Bong Go, dai soboot dapat bini-baby ang mga durugisto. Ang simbag man ni Senator Hontiveros, sisay soboot ang nag-baby sa laog ning pirang taon, nin huli ta so mga bigtime na imbwelto mantinidong libredo.
Ang position ngonian ni VP Leni, nasa hostile situation, alagad, kung magiging epektibo ang saiyang approach, saro ining dakulang pwertahan sa saiyang future career, alagad kung magiging palyado, magiging bintana ini tanganing lingawan niya ang next ladder kan saiyang political career o ang pagiging presidente.
Very excited ako kung ano ang magiging masunod na kabanata. Sa international community pinagkukundinar ang bloody war on drugs kan Pinas, kabale si VP Leni sa minakontra sa sarog kaini, kung kaya, ingkaso maging epektibo ang saiyang “Santong Dasalan Approach” papag-omawon siya kan bilog na kinaban.
Kung padagus ang pagdiskwento sa saiyang kakayahan bilang Bise Presidente, well, ang position na ini ang matau ning dakulang oportunidad tanganing magsaludo sa saiya ang saiyang mga kritiko. Intonses, this is a make or break system on her part.
So far, ini ang saiyang huring baraha. Komo mga bikolano asin mga Pilipino, bako sana ang political career ni VP Leni ang nakataya sa bagay na ini, kundi ang puturo kan mga Pilipino. Komo mga bikolano asin Pilipino, dapat hinguhahon ta man na maging parte kita kan solusyon asin da imaging parte kan problema sa droga.
***********
Ang hapot, ligtas pa kaya ang satong mga namamanwaan sa probinsya nin Catanduanes? Marahay pa kaya ang seguridad kan mga Catandunganon? Nin huli sa sunod-sunod na insidente ning garadanan, kung saen imbwelto ang mga nasa teaching professions, duda ang nagkakapirang sector sa seguridad sa happy Island.
Kung narurumduman niato, nagkapirang pasahero nin tricycle digdi sa Bato asin Virac ang nabiktima nin mga mararaot na element, igwa ning pigsalvage sa sarong lugar sa Virac na dai pa aram ang mga nasa likod asin ang duwang sunod nin insidente nin panggagadan sa duwang paratukdo. Saro ang solterong teacher na si Donn Carlos Bagadiong sa CNHS na ginadan sa saiyang residente sa Valencia asin ang paratukdo sa Tucao-Maysuram elem. School na ginadan mismo sa saiyang harong sa barangay Toytoy, Caramoran.
Parehong pinagkokonektar sa panghahabon ang insidente. May suspek na sa Bagadiong slay case mantang blangko pa ang PNP Caramoran sa kaso kan biktimang si Mel rose Baloloy y Trilles. Mala, nagtataram ang PNP sa paagui ni mayor Glenda Aguilar na igwa na ning lead, alagad dai pang naipipresentar sa publiko. Nagpaluwas na nin 150K ang lokal na govierno nin Caramoran para sa ikakadakop kan mga personang nasa likod kan sinabi ng insidente.
Dakulang agyat ini sa lado kan komandansya ni PNP Provincial Director Paul Abay. Ang hapot, isolated ba ini o medyo naglalala na ang sistema nin pase orden sa probinsya?
Remember, pirang taon na ang nakalilipas, alagad dai pa ma-identipikar kung siisay ang guminadan ki depuntong Larry Que. Maililista na sana baga sa tubig ang sinabi ng insidente? Kung igwa pa ning solusyon, sundo nuarin mahalat ang pamilya?
