Bicol Peryodiko

PRAYORIDAD

Aprub na sa SP ang 150-M na kantidad para sa pagbakal nin heavy equipments. Feasible soboot ang proyekto nin huli ta maganar ini nin dakulang revenue pabor sa lokal na govierno na makatabang down the line sa mga basic services pabor sa tawo. Are we putting cart ahead of the horse? How about the expenses may be incurred, the maintenance and the loan itself na babayadan kan kwarta ni Juan Dela Cruz? Esep-esep mga ginoo.

Parte soboot ini ning rehabilitation efforts kan lokal na govierno nin huli sa mga luma ng ikipahe sa motorpool. Intonses, ang sumada, hitting many birds in one stone.

Alagad, sa ibong kan revenue generation na pinaglalaoman na gaganaron kan LGU, siyempre, dai mahahale ang komentaryo sa lakdang na ini sa tahaw kan pandemic COVID-19. Ang hapot, magkakanigo kaya sa ngonian na isulong ang pagbakal kan mga ikipaheng ini mantang yaon kita nasa pagresponde sa pandemya?

Public knowledge na dakula ang kakulangan lokal na govierno kung papano tungkusan ang covid-19, kairiba diyan ang kakulangan sa pasilidad, arog kan EBMC asin iba pang public hospital na kontralado kan lokal na govierno.

Aminado ang pamunuan kan EBMC kan maghampang sa SP si Hospital Chief Dr. Abella sa nagtalikod na mga bulan na dai sinda ready sa covid-19. Rason, kulang ang mga ikipahes asin kakulangan nin mga personnels na maresponde. Litaniya kan hospital chief, empty handed sinda ingkaso igwa ning magiging pasyente.

Kan magluwas ang issue sa turu-turo system, partikular  ki patient 82, nakumpirmar duman ang sinabi kan pamayo kan EBMC na talagang dai ning kapasidad ang ospital sa arog kaning mga kaso. Ang remedyo, protocol invocation. Tapos ang kaso.

Ngonian, simple man sana ang interpretasyon kan ordinaryong sibilyan, gapalibre sinda sa posibleng epekto kan covid, alagad ang nasa likod kan arog kaning denial iyo ang incapacity na imanehar ang arog kaining mga pasyente.

Ang protocol, saro sana man na guidelines asin dai ako nagtutubod na mapapadusahan ang EBMC asin iba pang ospital sa pagresibi kan arog kaan na helang. Remember, naluwas na mas may kakayahan pa so RHU o mga isolation facilities na mag-atendir ning covid-19 patient kaysa sa mga may mandatong ospital sa Catanduanes.

Ang suma tutal, dai kita ready, arog kan enot ng pinagbuyagyag ni Dr. Abella sa SP session antes na magtukaw si Gobernador Cua.

Ang hapot, hahalaton ta pang magdakul ang covid patients antes kitang magtumar aksyon? First things first, ika nga.

************

Ngonian na Hulyo, ang anibersaryo kan premerong taon kan mag-asumir sa pwesto ang mga bagong elihidong opisyal sa bilog na Pilipinas. Boot sabihon, duwang taon na sana, election na naman. Ang hapot, gurano na kadakul ang mga repormang naidara kan mga tinawan ning mandato na nagluhod-lihod sa mga botante kan nagtalikod na election, partikular so mga local chief executives officers?

Dakul sa Catanduanes ang mga bagitong alkalde asin mas magayon kung kada saro sa mga ini, igwa ning ibibiklad na accomplishment reports sa laog ning sarong taon. Sa accomplishments report, bako man perming nakapatugmad sa quantity, kundi ang quality asin impact sa publiko.

 Iyan ang satong uugidon sa mga maabot na aldaw kung siisay sa mga bagitong alkalde sa probinsya ang nakua ang patama aain kasimbagan sa mga pangangaipo asin suriyaw kan saindang mga constituents.

Kung ingkaso, dai pang maipagmamalaki ang satong mga alkalde sa nagtalikod na sarong taon, igwa pa ning sarong taon tanganing makarecover, or else, pwede ng mag-alsa balutan paluway luway.

***********

Mapupurbaran ang kapas kan bagong Municipal Administrator kan Virac sa persona ni Madam Eloisa Pastor. Si Admin Pastor, retired DILG official asin dakul ang potential tanganing makapag-kontribuer nin dakul na ideya sa pagpadalagan kan renda ning govierno sa capital town.

Saro siya sa mga pinaghahanap kan banwaan ning Virac na makatau ning giya ki Mayor Posy SArmiento, lalo na ang polidong pagpadalagan. Nakataya ang saiyang pangaran sa sitwasyon na ini asin ingkaso maging tupo ang saindang ideya sa alkalde, magiging blockbuster ang tandem na ini sa probinsya.

**********

Saro sa ipinagmamalaking proyekto sa turismo ni Mayor Honesto Tabligan sa banwaan nin Pandan iyo ang Hiyop Point.

Ang Hiyop point, haloy ng pangaturugan ini kan mga nagtalikod na administrasyon asin ngonian igwa na nin ginigibong improvement. Kadabes na magkakaigwa ning bagong alkalde, saro sa prayoridad ang sinabi ng lugar na pinapangarap na marealisar asin ngonian, Kudos sa presenteng alkalde sa paluway-luway na improvement sa lugar.

Sa ibong kan pandemya marhay ang mga lakdang na pag-establisar ning mga tourists spots tanganing ingkaso balik na sa normal siertong dudumugon ini ning mga domestic asin foregn tourists. “Anticipation is the best policy”.

*********

Kaipuhan magtumar aksyon ang lokal na govierno kan San Andres sa reklamo kan mga biyahero nin huli sa dollar na presyo kan mga tricycle pasiring sa banwaan ning Virac vise versa.

Natukar ta na ini sa nagtalikod na mga issues, alagad, mawot tang pukawan ang SB sa pangengenot ni Vic Mayor Leo Mendoza maging ki Mayor Peter Cua na iregulate ang pamasahe kan mga tricycle na mina-opurtunisar sa sitwasyon. 250 to 350 ang pamasahe kan mga tricycle asin kung maheheling ka na medyo igwahanon, tibaad, dakula pa ang hagadon, basado sa obserbasyon asin kapritsu kan driver.

Sa Virac, regulated na ang taripa sa paagui ning executive order asin pwede ining tungkusan kan SB San Andres nin huli ta dai ta aram kung sundo nuarin madurar ang pandemya.

************

Exit mobile version