Mantinido ang paglangkaw kan kaso ng covid-19 sa probinsya nin Catanduanes sa nakalipas na apat na semana.

Dai minababa sa 50 ang datus kan Provincial Health Office asin DOH, kung kaya pinagtaas na ang alerto sa numer 3 ang nagkapirang lugar sa isla.

Ang Virac, Bagamanoc asin Pandan ang may pinakahalangkaw na active cases asin posibleng maglangkaw pa soboot ini sa mga masunod na aldaw dahilan sa mga contract tracing. Temporarementeng pinagsarado muna ang mga tourism sites sa sinabi ng lugar asin inimplementar ang liquor ban tanganing maiwasan ang padagus pang hawaan.

Naluwas na dai napupurok ang paglangkaw kan covid-19 sa isla, intonses, bakong epektibo ang mga measures niatong iniimplementar. Ang hapot ang epektibong lakdang, Iyan dapat ang diskubrehon.

Saro na epektibong lakdang dyan, bawalon muna ang mga selebrasyon, okasyon asin napapanahon na ang implementasyon provincewide nin liquar ban. Ang curfew, dakula din ang tabang tanganing maiwasan ang irinuman ning banggi asin mga happenings.

***********

Dakulon na ang naghaharalat ning bakuna sa islang kayganda, pero dakul ang dai pa naaabot. Tama ang ginibo kan SP sa paagui ni bise gobernador Shirley Abundo na kalampagon na ang DOH na deliberan kita ning dakul na numero nin bakuna.

Ang naheheling tang dapat enotan iyo ang kaipuhan kan capital town. Kung makakaabot sana vaccine caravan ni VP Leni mas makakatabang ini tanganing maparikasyon ang bakunahan. Kudos ta  naaprubahan na ang Catanduanes State University tanganing maparikas ang bakunahan.

Ano ang rationale kung nata dapat enoton ang Virac? Uya kadaklan guikan ang virus na napupunta sa ibang mga munisipyo. Being the center of commerce, siertong dakul ning positibo digdi na dapat natatawan nin atensyon.

Kung pagparaenoton ta so mga hararayong munisipyo lalo na kung kulang man ang gapositibo, medyo nasasayang so effort. Although, kaipu gabos mabakunahan, mas magayon so mga possible sources dapat enoton. Gare man sana droga, kung so main source dai napupurok, siertong palyar ang kampanya.

Kan sarong bulan, estorya kan sarong Doktor, sarong pulis na hale sa Virac na nakadestino sa norteng munisipyo, kinaagahan kan magbalik sa destino  nakamate nin symptoms asin naging positibo. Dakul naman ang na-contract trace maging ang sinakyan kaini. Nakiinuman soboot kan mag-uli sa Virac asin naging spreader sa sa Bagamanoc.

Pira ang arog kaining estorya? Siertong dakul ning parehong sitwasyon, kung kaya, effective strategy ang dapayt adaptaron. Ano daw kung namemeriting pa kan mga nanunungdan ang mga alkalde asin mga municipal  health officers tanganing maghagad nin inputs kung ano ang dapat guibuhon?

Saro ini sa failure sa probinsya nin huli sa kawaran nin consistent meeting kan mga frontline officials lalo ang mga alkalde asin IATF municipal tanganing purukon ang naglalalang sitwasyon sa islang kayganda.

Marhay so naging strategy kaito ni VG Abundo na igwa nin regular meeting ang mga alkalde Kariba  ang mga prime health personnel lalo na kung igwa nin mga immediate na dapat  tawan ning atensyon. Kung bihira mag-uurulay ang mga nanunungdan, siertong urula permi ang sabaw.

Ang laban kontra covid bako lang solong effort nin sarong opisyal, concerted effort digdi ang kaipuhan tanganing maging malibyano ang buhay sa isla.

******** 

Expected ta na magiging magayon ang performance kan PNP Virac sa mga masunod na aldaw nin huli sa bagong instular na CCTV sa mga strategic points kan poblacion. Pwede ining apudon na Covid Camera TV.

Magiging madali ang pagresulvir sa mga krimen kung magagamit ning marhay ang sinabi ng bagong mga ikipahes. Pinagbanggit na ugaring sa mga interviews ni Chief of Police Tony Perez kung saen nakalaag so mga CCTV..hehe.  Aram na kan mga pasaway na persona kung saen sinda pwede mag-iwas tanganing dai mahagilap kan camera.

Anyway, saro sa mga obheto kan CCTV komo prevention sa mga marararot na element kan sociodad. Dakul na ning pruweba na grabe ang tabang kan CCTV sa pagresulvir ning mga krimen. Bako gabos 24 oras nalalaganan nin pulis sa mga lugar prone accident areas asin dakul ning mga pasaway, alagad ang CCTV maheheling niya gabos maging banggi thru night vision. Kaipu lang nin marikas na mata kan mga nasa monitoring center kan PNP tanganing maibato kaagad sa responder’s team.

**********

Magayon ang naging Sistema kan LGU asin RHU Caramoran na darahon sa mga barangay ang vaccination program.

Nagkaigwa ning clustered vaccination ang grupo ni Dr. Faye Tanael kung kaya haros saturated na ang vaccination sa mga hararayong barangay.

Dai kaya, peming sa RHU sana ang vaccination asin saro ini sa nagiging problema kan mga gustong magpabakuna dahil sa transportasyon asin posibleng hawaan sa pagbiyahe kan mga babakunahan.

Kan premerong semana kan Agosto, saro ang saindang lingkod sa nabinipisyuhan na mabakunahan nin huli ta mismong ang RHU ang guminibo nin paagui kung papano abuton ang mga hararayong lugar.

Mala, dakul pa so sobra kan mga mapabakuna asin kinulang pa so bakuna. In times like this, dapat talaga igwa ning effort kung papano maidara ang basic services sa tawo.

Advertisement
Please enable JavaScript to view comments powered by Disqus.