FANTASTIC/WALASTIC: Mission accomplished si Bishop Manolo A. Delos Santos makalihis ang harus 28 taon na pagiging obispo nin Diocese of Virac sa probinsya ning Catanduanes.
Dakul ang saiyang magiging memorabilia sa isla makalihis na mabuksan niya ang dakul na mga Parokya asin mga mission churches sa laog kan harus tolong dekada.
Kan nakaaguing Biyernes, Agosto 5, isinaguibo ang saiyang ika-75th na kompleanyo na pinag-atendir ning dakula ng mga parokyano kairiba ang limang Obispo na sinda Archbishop Rolando Tirona ng Nueva Caceres, Archbishop Gilbert Garcera ng Lipa City, Bishop Alan Fialogo ng Diocese of Sorsogon, Bishop Joel Bailon ng Diocese of Legaspi at Bishop Jose Rojas ng Libmanan.
Kasabay kan sinabing selebrasyon iyo ang saiyang retirement age kan obispo sa Diocese. Segun ki Rev. Fr. Felbert Reyes, matinir siyang obispo mientras na dai pang nanunumbraran na masalida sa saiyang pwesto ang Santo Papa.
Happy birthday and Happy Retirement Most Reverend Manolo Delos Santos!
Pinapaabot man kan saindong lingkod ang special na greetings nin Happy Birthday sa Agosto 8 sa samuyang ina na si Mrs. Rosita Manlangit Brizo sa saiyang ika-85 kompleanyo. Good Health and More Happy Birthdays to Come!
*********
Double celebrations ang birthday bash ni Deputy Majority Leader Jose “Bong” Teves, Jr. kan petsa 3 ning Agosto nin huli sa mga mehuras na saiyang naresibi.
Enot ang pagkakanumbrar sa saiya komo Deputy Majority Leader sa House of Representatives mantang ang saiyang aki unanimously pignumbraran komo Presidente kan Mayor’s League sa Probinsya ning Catanduanes.
Basado sa impormasyon, star-studded ang naging birthday kan solon sa Metro Manila, kung saen harus kadaklan sa mga local officials nagpasiring sa sinabi ng okasyon. Maging ang session kan SP sa Manila pinagasaguibo mantang ang election kan Mayor’s League duman din sa LMP Manila pinagkunducir.
Manifestation ning pag-apreciar sa kakayahan kan Teves father and son ang ipinapaheling kan mga lideres sa isla. Laom ta ang tripleng higus kan duwang lederes tanganing fully satisfied bako lang ang saindang mga kapanalig kundi mga habitantes kan Catanduanes.
***********
Apreciado ta ang espwersus na ginigibo ngonian kan bagong kongresista sa Catanduanes katakod kan proyektong Friendship Bridge (FB) na makonektar sa probinsya ning Catanduanes asin Camarines sur leading to the mainland area.
Sarong laudable project ini na mabukas ning dakul na oportunidad sa bilog na Catanduanes sa ngaran kan turismo asin sa ekonomiya as a whole.
Pinagpunan ang sinabi ng proyekto sa panahon ni dating Gobernador Cely Wong sa tabang nin dating kongresista asin gobernadora Jun Verceles, alagad nin huli sa budgetary constraints, medyo naging pangarap sana ini.
Sa pagbuhay kan sinabi ng proyekto kan bagong lone district representative, tibaad maging realidad ini sa tabang kan man laen laen na ahensya de govierno, maging mga pribadong kompanya o individual.
Kung ngonian, nakukumpasan kita sa benepisyo kan scheduled ferry boats, this time, kung mangyayari, magiging unlimited na ang paglimok-limok niato pasiring sa ibang parte kan nasyon.
Hari naway, mangyari ang sinabi ng pangaturugan sa intervention kan Mahal na Dios.
BVOX POPULI VOX DEI: Saro sa napansin kan mga obserbador sa duwang public engagements ni President BBM iyo ang kawaran ning pagbanggit sa programa o malinaw na plataporma sa graft and corruption.
Ang hapot, anong rason sa pagiging silent kan presidente sa issue kan corruption asin human rights violations?
Kabale sa pinakadakulang issue kan nakaaguing election iyo ang issue ning kurapsyon na infiltrated ang gabos na mga ahensya de govierno. Sa obserbasyon kan nagkakapira, dakul sa mga nakaposition ngonian ang kampante sa magiging manera ning palakaw, particular sa mga proyekto nin huli ta daing nababanggit na measure konta sa sinabi ng kanser ng helang kan nasyon.
Anyway, nagpopoon pa sana ang Marcos administration, maheheling ta ang mga pagbabago asin timbre kan saiyang administrasyon makalihis ang saro sundong duwang taon nin huli ta nasa honeymoon stage pa sana siya asin ang saiyang mga kasangga sa saiyang rehimen.
*******
EYE IN THE SKY: May mga nagpapaabot sa saindong lingkod ning impormasyon katakod kan padagus na paglusot kan mga karneng orig hale sa Caramoan, Camarines sur. Segun sa impormasyon maabot sa 20 orig pataas ang minaagui kada semana asin pinagdedeliver sa merkado kan San Andres asin Virac.
Nagrereklamo ang mga nag-aalaga ning orig sa isla ta kompetensyado soboot sinda sa baratong presyo apisar pa sa peligrong pwedeng ihatod kaini sa mga konsumedores sa isla, particular ang African Swine Fever.
Pinagpaabot ta na ang impormasyon na ini sa lado kan PNP San Andres asin sa lokal na govierno tanganing aktwaran asin beripikaron ang sinabi ng impormasyon. (FB EYE/BY: FERDIE BRIZO)
***********
