Back to square one ang gabos na probinsya sa Bicol Region makalihis na sumikad na naman ang dakulang numero kan covid-19 cases sa nakalipas na duwang semana poon kan bagong taon.
Sa presente, ang gabos na probinsya, nasa irarom kan Alert level 3 category poon kan petsa sundo sa petsa 31, 2022.
Sa siring na sitwasyon, 3-50 percent ang mga restrictions sa mga establismiento asin sa pagralaog sa opisina kan mga empleyado sa govierno.
Kairiba sa mga pinagbasehan ang paglangkaw kan bed utilization rates maging ang marikas na paglangkaw ning mga kaso asin ang nairehistrong delta variants sa rehiyon apisar pa sa pinaghahandalan na Omicron variant.
Sa datus kan DOH duwa na (2) ang kumpirmadong Omicron sa rehiyon, 56 ang Alpha, 127 ang Beta, asin 637 ang Delta. Basado soboot sa record, dominant pa man guiraray ang delta variants kung pagbabasehan ang mga samples na pinag-ebabalwar sa mga laboratories.
Nin huli kaini, liwat na nag-apelar ang DOH sa mga residente sa rehiyon na maging parte kan solusyon, partikular ang pag-iingat sa salud, pag-iwas sa mga matatawong lugar asin iba pang mga preventive measures tanganing maibitaran ang mas lalo pang paglala kan covid cases sa rehiyon.
Kumbinsido ako na gare pigmaneobra ang pagbagsak kan numero kan covid-19 cases kan nakaaguing Pasko asin bagong taon tanganing mabweluhan so selebrasyon, alagad ang mamundo iyo ang consequences na ngonian gabos kita nahahadit sa padagus na paglobo kan kaso na maabot na sa kwarenta mil.
Saro sa epektibong solusyon iyo ang border control tanganing dai makalaog ang omicron na mabilis ang pagkalat sa Metro Manila maging sa mga key areas sa nasyon.
Kudos sa LGU Catanduanes sa pangengenot kan IMT sa immediate action lalo na sa paghigot sa border. Sana honest to goodness ining maiimplementar kan mga nanunungdan tanganing mairayo ang Catanduanes sa malalang sitwasyon.
Apisar kan mahigot na preventive measures, kooperasyon kan publiko ang kaipu tanganing dai kita magbalik sa level 4 asin halangkaw pang karegoriya. Ang tama asin honest to goodness na pag-observe kan minimum health standards ang kontribusyon kan lambang saro tanganing mamantinir na dai makalaog sa probinsya ang Omicron asin iba pang variants.
*************
Bago na ang Provincial Director kan PNP sa Provincia nin Catanduanes sa katauhan ni PD Benjamin Balingbing, Jr. na nag-asumir kan saiyang pwesto kan nagtalikod na Enero 8 karibay ni dating PD Brian Castillo.
Ang movement kan mga opisyal kan PNP sa rehiyon asin iba pang parte kan nasyon parte kan preparasyon para sa paabuton na pirilian sa Mayo 2022 tanganing mapreventaran ang familiarization sa mga pulitiko.
Ang lakdang na ini igwa ning benipisyong epekto sa padagus na pagmantinir kan pase orden asin mga bagong approaches na ipautob kan bagong pamayo.
Sarong example iyo ang pagiging mailap sa media ni dating PD Castillo kumpara sa nagtalikod na mga PDs arog ki PD Paul Abay, harus 24 oras pwedeng interbyuhon ingkaso kaipuhan..hehe.
Lugod yaon ang perming pagiging transparent tanganing impormado asin kalmado ang publiko sa mga nangyayari sa kapalibutan, particular sa saindang mandato na mantiniron ang koneksyon sa publiko.
So far, very active ang mga police stations sa bilog na Catanduanes. Harus updated ang mga facebook pages ninda sa mga pangyayari kairiba na ang mga advocacies lalo na ang pagbisita sa mga barangay asin pagpaliwanag kan mga bagong ley. Naipapamate sa publiko ang pagiging protector asin visible kan satong mga kapulisan.
Looking forward kita sa mga innovations asin bagong approach kan bagong pamayo kan PNP Sa Catanduanes sa persona kan dating Regional Mobile Group Commander na si Pol/Col. Balingbing. Sana maging balingbing siya pabor sa tawo asin bako sa mga mapalakas na mga personalidad ngonian na election..hehe.
Kabale sa mga unresolved murder cases, ang nakalista sa tubig na mga kaso sa Catanduanes na pwedeng tawan ning atensyon kan bagong pamayo kan PNP iyo ang mga minasunod na persona.
Paratukdo na si Mr. Bagadiong kan Valencia, Besa brothers na biktima nin riding in tandem sa Brgy. Salvacion Virac, tinambangan sa Francia na si Engr. Jesus Albaniel kan SIV, mga tinambangan sa Viga, Catanduanes asin ang harus 4 na taon ng gakaturog na kaso ning pananambang ki depuntong Larry Que sa Virac.
***********
Sa datus kan DOH, haros 50 porsiyento ng bakunada ang populasyon kan Catanduanes asin dikit na sanang iktad, maabot tana ang herd immunity. Ang herd immunity iyo ang 70-90% ng bakunado ang target papulation tanganing mapreventaran ang mga severe cases.
Segun sa datus, dakul sa mga nagagadan this time iyo ang mga bako pang bakunado mantang dikit na mga kaso sa nabakunahan na.
Ang konklusyon, igwa na ning protection laban sa paglala ning helang ang mga bakunahan kumpara sa dai pa.
May banta si Presidente Duterte na ipapa-aresto ang mga dai masunod magpabakuna. Parte ini kan police power of the state tanganing mapreventaran ang mas pang pagkuriyat kan virus.
Sa mga dai pa bakunado, magdasal, magresearch asin dai tabi pagbasulon ang govierno kung manapur-akan kamo ning virus ngapit na panahon.
************
Enot na bulan pa sana ning taong 2022, harus mga breaking news ang mga pangyayari sa provincial nin Catanduanes, partikular sa banwaan ning Virac.
Enot digdi kan petsa 4 durante kan matusta sa kasulo ang apat na miyembros ning pamilya sa Barangay Concepcion Virac mantang sinusundan ini kan pagkagadan kan tolong miyembros ning pamilya nin huli kan pambabadil kan sarong miyembro ng Provincial Mobile Force Company sa Barangay Hawan Ilaya.
Lesson learn ini sa lado kan mga may karagadang badil, particular ang mga uniformed men and women. Dai ta pagkalaag sa satong mga kamot ang mga sitwasyon, particular ang mga domestic problem na pwede man sanang ayuson.
Aram ta, mahigpit ang screening sa mga uniformed men so pinag-aapod na neuro examination antes na makalaog kan sa pagiging pulis.
Sa ibong na lado, dai man kontrolado niato ang mga sirkumstansya, lalo kung ang sinasabing pinag-ugatan iyo ang selos kan agom. Ang spiritual aspect sa sarong persona o pamilya ang dakulang tabang tanganing mantiniron kitang kontralado asin kalmado ang sitwasyon.
Condolence sa pamilya Malasa. (#FB EYE/FERDIE M. BRIZO)
