Nin huli sa political intervention kung kaya nalalaag na naman sa kontrobersiya ang issue kung siisay ang dapat tawan nin pabor na independent power producer sa FICELCO. Igwa nin nagkakapirang local officials na pabor sa extension kan CPGI mantang igwa man nin ibang local officials na ang gusto so generator kan SUWECO.
Ang hapot, siisay ang dapat sundon? So mga politiKo o sa mga taga FICELCO? Kung marurumduman ta, sa panahon nin election, dakul nin nagluwas na kontrobersiya sa soboot porsiyentong nakukua kan mga bistadong opisyal sa mga independent players. Igwa man nin impormasyon na dai soboot kinaya kan sarong supplier ang demand kan sarong politico na pirang porsiyento sa kada pagsuplay asin igwa man nin gustong arburon ang sarong hydro.
Saro man sana ang konklusyon kung nata dakul nin nakiaram sa padalagan kan FICELCO, particular sa kung siisay ang dapat paburan, iyo ang kalansing ning perak.
Kung arog permi kaini ang kaisipan kan satong mga lideres, poon kaito sundo ngonian, perming mabwelta sa dating gawe ang palyadong supply nin kuryente asin mayormenteng apektado ang mga konsumedores. Pakiulay ta sa mga koreanong politiko, apreciado ta ang saindong intervention sa problema, alagad dapat solusyon ang magmayor na mission, asin bakong personal interes na “magkano akorean”.
*****
Congratulations sa local na govierno kan Catanduanes asin kan Provincial Tourism Office sa halipot alagad dasok na presentasyon kan Catandungan Festival 2017. Once again, Congratulations man sa mga naging finalists kan Bicol Peryodiko Festival of Music asin sa mga nakisumaro na magheling sa grand presentation, particular ang mga major asin minor sponsors na iyo ang nagtau nin kusog tanganing marealisar ang pagdiskubre kan satong mga local talents sa bicol region. See you again next year sa mas magiging komprehensibong presentasyon.
****
Dakul nin minasaludo ngonian sa higus kan RTC Judge sa Catanduanes sa persona ni Judge Lelu Contreras. Segun sa impormasyon, pinag-aabot ning banggi ang hearing tangani sanang marikas na matapos ang mga kasong pinagsasangat both sa Branch 42 and 43. Kudos ki Judge Lelu sa marikas na disposition nin mga kaso. Kaining nagtalikod na semana, harus dakul ang nasentensyahan sa droga both conviction and exoneration.
****
Mientrantanto, kudos man sa lado kan BJMP Virac sa espwersus na matabangan ang mga presunero na deserving matawanan nin marikas na paglaya nin huli sa positibong performance sa laog kan presuhan. Dapat sabuton ta na bakong gabos na nakukulong may kasalan, ang iba dyan, biktima nin injustice nin huli sa kakapusan sa buhay. Kaining nagtalikod na Oktubre minaabot sa 31 ang releases kan BJMP Virac asin kinukunsiderar na pinakadakulang numero ngonian na taon kumparar sa nagtalikod na mga taon.
****
