Kudos sa ondra na pinagdara ni Faith Ola kan Team Bagwis. Naguno ni Faith ang solamenteng gold medal kan Catanduanes sa enot na aldaw kan ralaban asin dai na ini nasundan pa ning kaparehong record.
Saro si Faith sa haloy ng nagdadara ning ondra sa Catanduanes sa mga palaro, kung saen nagpoon ini singko anyos pa sana. Trese anyos na ngonian si Faith asin liwat niyang tinawan ning ondra ang Catanduanes tanganing dai mazero sa gold medal. Nagtapos ang Catanduanes sa 21 medalya kung saen saro ang gold, walo (8) silver asin doseng (12) bronze.
Ang Camarines sur pa man guiraray ang unbeatable sa Palaro sa nakalipas na halawig na taon. Sarong agyat ini sa mga probinsya sa bicol kung papano papatumbahon ang dominanteng Cam sur. Kairiba kan Cam sur ang Naga City na harus nag-ikaduwa sa laban asin ikatolo ang Albay mantang nakua kan host province ang ikaapat na pwesto.
Maging inspirasyon lugod kan Catanduanes ang probinsya ning Cam sur asin Naga City, kung papano perming nadodomina ang mga kawat sa palaro.
Sa naging pagtaram ni Regional Director Gilbert Sadsad kan DepEd, pinagdirihiran kaini ang mga opisyal kan DepEd na dai dapat ning magiging bagsak na grado ang mga atleta na nakasabay sa sinabi ng sporting event. Ang bandera kan saindang probinsya, saro ng ondra na dapat maging rekognasyon soboot sa arog kainig effort. Pinagsuwestyon pa kan opisyal ang pagkrear ning “Sports Academy” sa mga probinsya tanganing mamantinir ang appetite kan mga parakawat asin maging competent leading sa mga national competitions.
Sa Palarong Bicol pinagpapandayan asin pinaghahasa kan mgaDeped officials ang mga potential national sports athletes kung kaya dakulang training ground ang gigibuhon kan DepEd sa mga divisions.
Magayon ang naging swestyon kan Director. Actually, iyo ini ang rason kung nata dominado kan nagkakapirang probinsya ang taunan na event. Nin huli ini sa regular na competition asin training kan mga parakawat. Sa Catanduanes, kung nuarin ang ralaban saka pa sana natatawan ning bwelo tanganing matais ang saindang mga kapas. Sabi ngani, huli man daw at magaling, ,huli pa rin. Resulta, kulelat.
Bueno, natupad kan Catanduanes ang wish na da imaging kapurit sa over-all standing, alagad kapurit man guiraray kita pag-abot sa lado kan mga provincial delegations. May mga adjustments na ginigibo ngonian ang DepEd asin magiging basehan ang recent palaro para sa mga masunod pang plano. Lugod mangyari na ang Sports academy asin kaipu digdi ang magkakanigong suporta kan govierno provincial tanganing matawan ning magkakanigong pondo asin mangyari na madominar liwat kan Catanduanes ang Palaro sa mga maabot na panahon
*********
