Nag-abot na so pinaghahandalan nin gabos sa probinsya nin Catanduanes. Igwa na nin casualty si COVID-19, ang patient 649, sarong market vendor, 65 asin residente kan Gogon Sirangan.

Mamundo, kaya lang, ini ang realidad na posibleng mangyari kung ang management nin covid cases sa probinsya nin Catanduanes dai matatawanan nin comprehensive aksyon.

*********

Mismong kinumpirmar ni Regional Director Anthony Nuyda kan DILG region 5 asin presenting chairman kan covid-19 sa bicol region na dai granted so saindang pinaghagad na temporary freeze sa pagpauruli kan mga locally stranded individuals maging mga ROFs sa mga probinsya.

Enot ng pinagsabi kan nagkakapirang mga alkalde na kaipuhan igwa ning crowd control ang govierno sa pagpalaog kan mga residente. Segun sa opisyal, decongestion sa Metro Manila ang lakdang na ini kung kaya pinangtutugutan. Swestyon kan opisyal, dapat igwa ning testing dapat sa mga ini antes mag-uruli sa saindang probinsya. Ginigibo na man soboot ini kan nagkakapirang mga probinsya tanganing mapreventaran ang paglakop kan virus.

Liwat na pinagpaguiromdom kaini sa publiko ang mga health protocols tanganing mapreventaran ang pagkalat kan helang.

Kung dai dinadangog ang Bicol Inter-agency Task force, intonses, dai man talaga dadangugon ang mga LGUs. Kaya, tuloy ang ligaya. HalaBIRA!

***********

Paramientras na pinagsarado muna ang Immaculate Heart of Mary hospital tanganing lugaran ang disinfection sa bilog na ospital mantang nasa quarantine man ang maabot sa 9 na mga empleyado na nag-asiste kan nagadan na covid patient.

Segun sa manihamiento kan hospital, parte ini kan saindang lakdang tanganing maging ligtas ang mga future patients.

Mawot nindang mahale soboot ang stigma kan mga namamanwaan nin huli sa impormasyon na sainda nagadan ang pasyente. Segun sainda, mahigot soboot ang saindang pinapautob na protocols tanganing maging ligtas ang mga pasyente maging mga empleyado.

Lugod, dai na madagdagan pa ang saro na casualty kan probinsya. Arog kan pinagtataram kan mga otoridad, ang pagpatanid na magsulog ning facemask, dai maglakaw kung bako man kaipung marhay, parte kan lakdang tanganing makaiwas. Dawa ano ang maging aksyon kan govierno tanganing presuhon ang mga dai nagsusunod, nasa sato man sana ang timon tanganing makaiwas sa helang.

Magsunod tanganing dai maging biktima ni covid.

**********

Igwa nin naghahapot kung ano ang papel kan probinsya sa mga kasiributan ngonian kan mga municipal chief executives?

Mas magayon siguro, tukawan kan mga LCEs kairiba ang gobernador tanganing magbilog ning comprehensive plan kung papano dai na maglakop pa ang helang.

Two head is better than one. Dai ini kakayahon kan mga munisipyo kung makulang ang suporta kan probinsya.

*********

Perming sarado ngonian ang nagkapira sa mga importanteng akomasyon para sa mga pasyente na EBMC na iyo kuta ang pigalaoman kan mga pobreng tikoy.

Mala, ang mga pobreng naaraki nin ceasarian, yaon sa mga pribadong hospital na palabaw ang mga singil ta mala pribado. Maliban sa lockdown, ano pa tabi ang remedy tanganing dai maputol ang serbisyo sa mga pobre?

Segun sa impormasyon, ang EBMC na saro sa mga  hospital sa Bicol na natawanan ning dakulang kantidad para sa advance payment kan Philhealth, na dapat para sa mga covid cases, alagad, gare habo sa covid patients.

********

Si Mayor Posoy Sarmiento na ang nagdeklarar na igwa na ning local transmission sa banwaan ning Virac nin huli kan pagpositibo kan nagkakapirang personalidad na dai ning magkakanigong travel history.

Sa ibong na lado, ingat man na magpaluwas nin statement ang Provincial Health Office kung igwa na mananggad ning local o community transmission. Segun ko Dr. Hazel, mabase soboot sinda sa resulta kan mahiwasan na contract tracing.

Kung dai nin deklarasyon ang Provincial health Office sa arog kaining nangyayaring sitwasyon, siisay ang lalaoman tang health authorities na igwa na kitang community transmission?

**********

Advertisement