Medyo nataraka so kadaklan na mga obserbadores sa biglaang pagbawi kan lokal na govierno kan Virac sa almost 1 month ng curfew.

Sarong aldaw ini makalihis na magpahayag ning pagkontra si Mayor’s League President Peter “Boste” Cua sa plano kan Sangguniang Panlalawigan na gibuhon na provincewide ang curfew.

Ang obserbasyon kan SP, epektibo ang curfew asin saro ini sa mga solusyon sa nagpapadagus na pagdakul kan covid-19.

Segun sa Mayor’s League President Cua, bako soboot epektibo ang curfew nin huli ta dai man nagbababa ang numero ning kaso ning covid-19 lalo na sa saiyang munisipyo, apwera kaini, bako soboot paborable sa mga negosyante na bukas kung banggi.

Depensa kan alkalde, disiplina soboot ang kaipu asin higot na implementasyon down to the barangay kan minimum health protocols.

Baranga ang komento kan mga nitizens sa pronouncement kan alkalde. Interpretasyon kan iba gare pinaburan ni Mayor Posoy Sarmiento si Mayor Cua.

Mienstrastanto sa intrevista kan Bicol Peryodiko, sinabi kan alkalde na bako ini basado sa tinaram ni Mayor Cua, kundi haloy na ining inagrangay kan nagkakapirang sector na apektado kan curfew lalo na ang mga negosyante na nalulugi asin posibleng magkaigwa nin retrenchment o magsarado.

Segun sa lkalde, nagbaba na man soboot ang numero kan kaso sa Virac asin kung liwat na maglangkaw ini, may posibilidad na ibalik man guiraray ninda ang curfew sa alas 9. Paglilinaw kan alkalde existido man guiraray so 10pm na curfew sa mga menor.

Segun sa impormasyon, dakul na talaga soboot na mga mina-agogoy na mga negosyante lalo na ang mga pambangging negosyo nin huli ta nawara so sarong parte kan saindang buhay.

Sa satong personal na opinion, bako kitang komporme sa pahayag ni Mayor Cua na wa epek ang curfew sa padagus na paglangkaba kan numero kan mga nagiging positibo. Ang lohika, kung sa ibong kan curfew dai napupurok ang paglobo kan kaso, how much more kung lalong daing curfew?

Kung bakong epektibo sa saiyang banwaan, posibleng bako ini ang sitwasyon sa ibang banwaan.

Sa banwaan ning Virac, namamate ta ang bentahe kan igwa ning curfew nin huli ta naminimisar ang paglamierda kan mga daing kurukarigos na mga pasaway na persona lalo na ang mga mahilig sa irinuman asin mga tambay sa kanto tanganing magtsirismisan.

Dakula ang bawas sa krimen, basado sa PNP asin bakong makulog sa payo kan mga pulis, tanod asin barangay officials na magsaraway asin magbantay kan mga pasaway tanganing tsitaron ang dai nagsusulog ning mask o kung may mask dai nasa tamang pagkabugtak.

Given na ang sitwasyon na talagang daing disiplina ang kadaklan sa satuyang mga kabarangay, hanggang dai tamaan ning covid. Pero lalo na kung dai ning restriction?

Kung magiging discretion sa mga pasaway ang pag-uli nin matanga o maagahon hale sa mga aling-alingan maging sa mga public places, mas mamumugtak sa danger zone so ibang gaingat sa saindang pamilya.

Prevention is better than cure, ika nga. Kung sa dikit na pagbawas nin numero kan covid maluwag kita nin todo, tibaad magiging perpetual problem na ang pandemic, partikular sa islang kayganda.

May punto ang Sangguniang Panlalawigan kung gabos na munisipyo igwa nin curfew asin dapat simultaneous ang oras tanganing may sarong polisiya.

Anyway, may discretion ng SP tanganing mag-imponir kung sa pagheling ninda magkakanigo ang pagpapadagus kan curfew.

Ang pangontra sa mga pasaway iyo ang kamay na bakal asin ang pangontra sa mga easy go lucky sa paagui kan mahigot na restriction.

Nag-asegurar man si Chief of Police Tony Perez na papahiwason ninda ang police visibility sa sentro tanganing maminimisar ang daugs na paglobo lalo na ang pagsitar kan mga daing face mask. Igwa daa sinda nin darang facemask sa kada pagronda asin ang daing mask na nasisitar pinagtatawanan kan saindang operatiba.

Kung dai makooperar gabos sa minimum standard sierto y segurong back to square one permi kita sundo sa ngapit na panahon. Sana dai permi mangyari ang pagbaba nin dikit nin kaso asin ma-abante nin pirang kilometro, saen kita pupuroton mga kaperyodiko!

********

Advertisement