Maswerte ang probinsya ning Catanduanes ki Tisoy.
Sa ibong kan uya sa probinsya napapabaretang ma-landfall ang bagyo na may kusog na 150 sundong 170 kilometro kada oras antes pang mag-abot sa rehiyon, harus grabe na ang pag-andam kan publiko.
Sa kasagsagan ning bagyo, namate kan mga Viracnon asin pagtaraed na lugar ang kusog na harus nagdurar ning maabot sa 9 sundong 10 na oras na pagbayo. Sa assessment kan PDDRMC, maabot 246 milyones ang distroso sa Agri asin infra sa probinsya.
Maabot sa 80,000 ang nag-ebakwar asin saro ang naireport na nagadan mantang 13 ang lugadan.
Sa comparison, medyo mild ang tama sa Catanduanes kumpara sa mga bagyong Nina kan 2016 na harus rinapunggas ang mga pangenot na lugar sa isla.
Arog kan dati, harus 2 sundong 3 aldaw bako naging stable ang signal ning mga telcos kung kaya nasakitan sa communication pasisiring sa luwas kan isla.
Arog kan dati, balik sa normal na sitwasyon ang isla. Kayod-kayod kayod asin abante sa paghanap ning ikabubuhay.
Ang buhay isla, pabalik-pabalik man sana. Maswerte kita kung dai tinamaan o kung tinamaan man bakong grabe. Siyembre balik sa realidad asin pakikibaka. Ang magayon na tonada ning mga panaramon kan mga propyong Catandunganon, sa ibong kan patakot kan mga makukusog na kalamidad, maogma man guiraray kita sa islang Catandungan. Sabi ngani, “there is no place like home”.
***************
Sa pabisita ni Presidente Duterte sa Legazpi, grabe daa ang gumod-gumod kan mga hepe ehekutibo ta imbes na pag-urulayan so mga maitatabang sa pinagrapunggas ni Tisoy, puro checmis buda mga pabida ang tono ni Presidente.
Kaya pag-uruli, daing bitbit so mga gobernador, kundi sarong sakong promesa. Ang hapot, pira lamang ang heras kan Catanduanes asin iba pang mga lugar.
Saro sa konswelo sa mga panaramon ni tatay digong so sabing hale sa Bicol ang masunod na presidente. Ang hapot, sisay? Segun sa presidente, kung bako si Congressman Joey Salceda si Gov. Chiz Escudero asin bako lang ki Leni Robrero. Hehe
Ano daw ang tiunay ni Presidente ki VP?
Anyway, sabot tana na nasa oposisyon si Leny, kung kaya talagang by all means mahanap man nin deperensya ang presidente nin huli ta permi man siya pigahanapan ning deperensya.
Seriously speaking, kaipuhan na man talaga kan Bicol na magkaigwa ning Bicolano president, kung gusto tang mag-uswag ang rehiyon. Sa ladawan na pinaheling ni presidente na puros mga Davaeno ang nasa pedestal, panahon na man tanganing magshine ang mga oragon na mga bikolnon. Mangyayari sana ini kung talagang igwa kita ning pagkasararo na suportahan ang kwalipikadong bikolnon sa maabot na presidential elections.
Apwera ki VP Leni, kapable asin igwa ning dakulang kapas ang mga nabanggit kan presidente.
************
Na fake news soboot ang duwang opisyal kan Bato sa persona ninda Mayor Johnny Rodulfo asin Vice mayor Roy Regalado kan panahon nin bagyo.
Segun sa impormasyon, dai soboot sa munisipyo ang duwa kan bagyo, pero sa kumpirmasyon ni bise alkalde Roy Templonuevo asin sa saindang post sa facebook account basado sa news yaon ang duwang opisyal.
Saro man sana ang boot sabihon, namimiss ang duwang opisyal na magrekoreda sa mga barangay lalo na sa Batalay kung saen duman hale ang reklamo. Dai man dapat isnabon kan mga opisyal kan Bato ang Batalay sa ibong kan taga dyan ang dating alkalde na saindang nakalaban.
Dai man dapat maging onion skinned ang satong mga opisyal kung pighihidaw kan mga kabarangay dahilan ta dawa dai nagboto sainda so mga kalaban, sinda man guiraray ang pinagmimirar na alkalde dahilan ta sinda ang pinapili nin mayoridad.
Baka masyadong naging laki sa layaw ang Batalay na perming yaon dyan ang dating alkalde? Hehe!
