Sa resumption kan biyahe kan mga jeepneys, PUVs asin iba pang mga sasakyan sa Metro Manila, ang distancia kan mga pasahero sa laog kan mga sasakyan ang naging mainit na issue.

Nin huli ini kan pagbaranggaan kan mga opinion guikan sa mismong mga  natukahan na opisyal sa laog kan IATF. Kabale digdi ang DOTr asin Department of Health.

Magkakaiba ang rekomendasyon kan lambang lado, entre kan transport officials asin health officials. Segun sa grupo ni Secretary Arthur Tugade kan DOTr asin Secretary Garvez, kaipuhan bawasan ning distancia poon sarong metro pasiring sa .75.

Segun man sa grupo ni Secretary Duque kan DOH asin Secretary Año kan DILG asin mga medical experts dapat mantiniron ang dating patakaran sa distancia, or else, posibleng mag-back to square-one kita.

Naribong si Presidente Duterte kung kaya sa saindang cabinet meeting pinapasumitir ang duwang lado nin rekomendasyon tanganing pag-adalan.

Ang hapot, siisay dapat ang tamang sunudon pag-abot sa mga health protocols? Ang Generals, Abugado o mga Health experts?

Dakul ning nadidisganar sa sistema kan pag-aturgar o pagmanehar sa pandemya. Nakukulangan ang iba sa mga medyos kan mga nakaturukaw sa pwesto. Kung dai na pinapangyari kan mga sekretaryo ni Presidente ang mga health expert’s opinion, sisay ang dapat tang sunudon?

Ang World Health Organization (who) sarong metro ang rekomendasyon nin huli ta talsik ning liwoy ang kawsa kan transmission. Maging ibang mga nasyon, mas halangkaw pa ang distancia sa sarong metro.  Ang sabi kan grupo ni Sec. Tugade, basta “no talk, maski harani dai problema. Nem. Gabos kaya makatios na dai mag-talk?

Kaya palan medyo semplang asin mabagal maresulviran ang problema kan covid-19 sa Pinas  ta “ Games of the Generals” ang gahiro asin bako ang mga health experts ang nasusunod.

Dapat kuta na, ang mga generals na ini nagpahiringalo na ta masyado ng, “ngaro (pagal) sa saindang propesyon”. Iba man kaya so mga huven pa na kapable kesa mga Heneral na Kibrado na ang Kalibre. Pwersa delos ubos.

Totoo, giyara ini, pero bakong kanyon asin  badil ang gamit. Dapat mangibabaw ang mga specialized personalities asin bakong militarized strategies.

**************  

Pinaglinaw ni DepEd Catanduanes Division Superintendent Danilo Despi na dai ning magiging online scheme sa isasaguibong ireskwelahan sa probinsya nin Catanduanes.        Segun sa opisyal modular instructions ang gagamiton asin ini soboot naisairarom na sa magkakanigong dry run. Kaya so mga magurang na nagalapigot pa na maghanap ning laptop asin signal lalo na sa mga liblib na lugar, no worry nin huli ta dadarahon sana sa saindang mga harong ang modules sa paagui kan mga barangay officials.

Sa bagong Sistema, bidang-bida ang mga magurang sa mga aktibidades kan mga kaakian nin huli ta sinda mismo ang magiging parte kan edukasyon kan mga kaakian.

Nagpoon na sa lado kan mga private schools ang klase asin online ang kadaklan sa mga ini. Medyo, dakula ang papel kan mga magurang pag-abot sa mga assignments nin estudyante, kung kaya hataw ang pagiging tutor kan mga Nanay at Tatay sa saindang mga ikus (kaakian).

*********

Pinag-extendir sundo sa Setyembre 31 ang pag-akseptar kan mga boot maging contact tracers sa mga munisipyo.

Segun ki DILG Regional Director Anthony Nuyda, pro-rata ang magiging distribusyon kan maabot sa 3,062 na alokasyon sa bilog na Bicol Region.

Dai pa ning eksaktong numero, segun ki Provincial Director Jun Razal kung pira ang mapupunta sa Catanduanes.

So may pinakadakul soboot na munisipyo iyo ang mayor na tatawanan ning dakulang alokasyon. Igwa man guiraray sobooot ang mga mga diit ang kaso ning covid para sa future incidents.

Mga criminologists asin medical courses ang pwedeng mag-apply asin sa laog ning tolong bulan poon Oktubre sundo Disyembre may kaakibat na 18k na sweldo ang mga ini.

Magiging mga expert ang mga ini asin magiging mabilis ang tracing procedures nin huli ta isasairarom man ang mga ini sa magkakanigong training antes na idelegar sa saindang mga trabaho.

*********

GREETINGS: Happy birthday kina Baby Bea Marie G. Brizo (3 years old) and Sister Melba Brizo kan September 17. More Happy birthdays to come!

*********

OBITUARY: Condolence kina Mr and Mrs Leonardo Tamayo and asin Atty. And Mrs Ramil Tamayo sa amay na pagpaaram sa kinaban ni Ms. Maribeth “Bing” Tamayo, ang aki ni Tiyo Nards asin Tiya Betty na tugang ni Atty. Ramil Tamayo asin Fr. Bong Tamayo.

Advertisement